Mae Sioned bellach yn athrawes yn Ysgol Gynradd Llandegfan, Ynys Môn ond cyn hynny, bu'n addysgu yn Ysgol yr Hendre Trelew, Patagonia ac yn Ysgol Gymraeg Llundain. Yn y bennod hon, mae Sioned yn siarad am ei phrofiadau o addysgu tu hwnt i Gymru a sut mae hynny wedi ei siapio hi i fod yr athrawes ydi hi heddiw.

Mae Gwyn yn bennaeth profiadol yn Ysgol Croes Atti, Sir y Fflint ac yn gwneud gwaith arbennig i hyrwyddo a datblygu addysg Gymraeg o fewn y sir. Yn y bennod hon, mae Gwyn yn siarad am ei brofiadau fel pennaeth ac am arweinyddiaeth yn y sector cynradd yn gyffredinol.

Mae Laura yn ddarlithydd blynyddoedd cynnar ym Mhrifysgol Metropolitan Caerdydd, ond cyn hynny, bu’n athrawes ac yn arweinydd y cyfnod sylfaen yn Ysgol Mynydd Bychan, Caerdydd. Yn y bennod hon, byddwn yn trafod addysg blynyddoedd cynnar yn gyffredinol, profiadau Laura o weithio ar draws pob oedran o’r cyfnod sylfaen, a’r gwaith o addysgu plant yn yr ysbyty.

Mae Meilir yn bennaeth yn Ysgol Glan Morfa, Caerdydd ac yn gwneud gwaith arbennig i gefnogi nifer o ddisgyblion sydd yn dod o gefndiroedd difreintiedig ac yn llwyddo i hyrwyddo a datblygu addysg Gymraeg yn ardal Splott o’r brifddinas. Yn y bennod hon, mae Meilir yn siarad am ei brofiadau fel pennaeth ac am arweinyddiaeth yn y sector cynradd yn gyffredinol.

Mae Gethin yn ymgynghorydd addysg annibynnol sy’n gweithio gydag ysgolion cynradd ac uwchradd Cymru a dros y ffin i ddatblygu eu cwricwlwm. Cyn iddo fod yn ymgynghorydd, roedd yn athro addysg gorfforol yn Ysgol David Hughes, Ynys Mon, cyn symud ymlaen i weithio i gonsortia addysg Gogledd Cymru. Yn y bennod hon, bydd Gethin yn ein helpu i ddeall asesu a chynnydd yn y Cwricwlwm i Gymru - pwnc sydd o ddiddordeb i nifer o ysgolion ar hyn o bryd.

Mae Judith yn nyrs, athrawes ac ymgynghorydd iechyd a lles annibynnol sydd wedi gweithio gyda sawl ysgol, dalgylch ac awdurdod lleol i'w hyfforddi, cynghori a’u harwain ar sut i addysgu iechyd a lles. Ar hyn o bryd, mae hi’n treulio’r rhan fwyaf o’i hamser yn cefnogi ysgolion ar addysg cydberthynas a rhywioldeb. Yn y bennod hon, bydd Judith yn trafod sut i addysgu’r Cwricwlwm Cydberthynas a Rhywioldeb, a sut i oresgyn rhai o’r heriau mae ysgolion ar draws Cymru yn eu hwynebu wrth wneud hynny.

Mae Jayne yn bennaeth yn Ysgol Gymraeg Brynsierfel, Sir Gaerfyrddin ond ar hyn o bryd mae hi ar secondiad gyda’r consortia addysg lleol fel Ymgynghorydd Strategol y Gymraeg Mewn Addysg. Yn y bennod hon, byddwn yn trafod pob agwedd ar les. Ers i Jayne gael ei phenodi’n bennaeth ar yr ysgol, mae sawl astudiaeth achos Estyn wedi cael eu hysgrifennu am y gwaith arbennig mae’r ysgol wedi ei wneud i gynyddu lles yn yr ysgol, a’r effaith mae hynny wedi gael ar y plant a’r gymuned ehangach.

Mae Lee yn bennaeth yn Ysgol Gynradd Brynaman. Ar ol eu harolwg yn Hydref 2023, cafodd yr ysgol ei chanmol am sut mae’n nhw’n llwyddo i ysgogi’r disgyblion i siarad Cymraeg. Yn dilyn hyn, mae Estyn wedi rhannu eu harferion mewn astudiaeth achos arfer effeithiol. Yn y bennod hon byddwn yn trafod yr hyn mae Ysgol Gynradd Brynaman yn ei wneud i ddatblygu’r Gymraeg i ennill y clod haeddiannol gan Estyn.

Mae Sian yn athrawes yn Ysgol y Tywyn, Ynys Môn, ond ar secondiad fel athrawes ymgynghorol plant mewn gofal yn yr awdurdod lleol ar hyn o bryd. Mae Sara yn athrawes yn Ysgol Gynradd Kingsland, Caergybi. Yn ychwanegol i’w gwaith arferol, mae Sara a Sian yn hyfforddwyr ar gyfer Trauma Informed Schools - sefydliad sy’n darparu hyfforddiant ar gyfer y gweithlu addysg ar sut i ddelio gyda disgyblion sydd ag anghenion emosiynol neu broblemau iechyd meddwl. Yn y bennod hon, byddwn yn trafod y wyddoniaeth a’r seicoleg tu ôl i’r problemau hyn, a beth allwn ni ei wneud i fod o gymorth i rai o’r disgyblion hyn.

Cyn haf 2024, cafodd Trystan ei benodi fel Arweinydd Cenedlaethol ADY (yr iaith Gymraeg).  Yn y bennod hon byddwn yn trafod ei rôl newydd a phopeth arall o dan yr ymbarél anghenion dysgu ychwanegol.  Cyn hynny, mae Trystan wedi bod yn Bennaeth Cynorthwyol a Chydlynydd ADY yn Ysgol Plas Mawr yng Nghaerdydd.